قصيدة خرافية الى كل الحبايب

كل ساعة انذبح من عرّست لليوم
وكل ساعة انسحكَ بجدام تذكارك

عكب ماكفرتني بحبك المن جاي
تقرالي وترتل سورة اعذارك

اجه وكت البرد وتدفة بيك الغير
ما الحك بعد واستانس بنارك

يالمثل النخل شامخ شجاك . شبيك
خليت الغريب يلوذ باكتارك

مرات النخل بس ينصعد ينباك
وانت بيوم عرسك كلي شاخبارك ؟

صدك تمرك خلص لمن اجاك الليل
صدك سعفك خدر وانطيت جمارك

دليته على روحك ماتعب وياك
مادور عليك وداخ فجارك

واحجيلي بعد هلغيبه كلي شصار
واحجيلك اسراري وبيهه نتشارك

لان تدري كبل كلي آنه اصير اضماد
اذا شريان صوتك ينزف اسرارك

يااعذب نهر تعله على جرفك ليش
تره الناعور غشك لمن اختارك

واعرفك فكرت ضنك تلوح الغيم
شوف لوين وصلت روجة افكارك

ذنبك امنت من شالك الناعور
رد اردود بيك وعالجرف دارك

ومادامك اجيت وتنشد على الحال
بعيونك تعال وشوف اثارك

كل ساعة انذبح من عرست لليوم
وكل ساعة انسحكَ بجدام تذكارك