كلمات لمسامعي وصلت؟ العراق يذبح من الوريد الى الوريد؟

كلمات لمسامعي وصلت
انت مسلم انت سني
انت مسلم انت شيعي
انت سني انت سعودي
انت شيعي انت ايراني
جردوني من عراقيتي العريقه
لازم السني العراقي يعادي الشيعي العراقي
ولازم الشيعي العراقي ينكر السني صديقه
هاي صارت عالطوائف وصخه لك هاي الطريقه
احنه بس جدنه العراق بكل حضاراته العريقه
احنه اول مملكه تغنت الحب
وغزل انخيدوانا الشاعره الحلوه الانيقه
حبته السرجون بعيون القوافي
وضلت بحبه حمامه تطوف بقصوره طليقه
يبقى العراق والدول المجاوره له اخوه متحابين مهما ارد الاشرار تمزيق الوحده
اخوكم خالد الهيتي

قصيدة قاله باله برتقاله الشاعر يحيى العلاق
نتصالح لو ما نتصالح ؟ .. قاله باله برتقاله ... وأفرض طلعت ما نتصالح شراح انسوي بهاي الحاله ؟ .. ****
معناها نقسم موطنة دولة شيعة .. ودولة سنة كل واحد يكتب دستوره وكل واحد جدول أعماله ... ونشرع قانون ايفرق ويكول الما واحد كاله .. '****
يا ويل السني اليتجرأ ويصاحب شيعي ويبراله ... ويا ويل الشيعي يحن كلبه ويدك ترميشة لجواله .. ولو شافو بالنقال اسمه الا يشيلوه بنقاله ..
****
والمتزوج من الثاني يطردها وينكر أطفاله ... وتشمل هاي الإجراءات حتى أرقام السيارات ماكو لوحة بصرة عراق وماكو لوحة عراق ديالى .. سنة عراق وشيعة عراق وكل واحد يعرف منواله ... ****
زوجي وفردي وطبعأ بإستثناء الكردي ما نكدر نمنع تجواله .. وممنوع يغنون لداخل لو يستمعون لمواله .. وممنوع نغني احنه الميمر لو مرت لمة خياله .. وممنوع بشارع يتلاكن ام دحام وأم جماله ..
****
كولو هذا اليوم شماله ... وكولو فال الله ولا فاله .. ليش اتخيل هاي الحاله ؟ .. ****
كمت اتخيل هاي الحاله من شفت الاستاذ اغتاله واحد ما يوصل لنعاله .. ومن شفت الدكتور اتهجر وأحتلو بيته النشاله ... ومن شفت العالِم متهدد حاير وين ايشد رحاله .. ****
يومية وكالو نتصالح والإشكال إنفض إشكاله .. ويوم الثاني تموت أطفال ويتفجر مسطر عماله ... لو تتفقون ونتصالح لو نرجع ع القاله باله .. .. قاله باله برتقالة

الشاعر يحيى العلاق