شعارات مواكب عاشوراء في كربلاء

هذه بعض من الاشعار ( الرددات ) في المواكب الحسينية في كربلاء والتي تكشف التوجهات الوطنية ورفض الظلم والجور والفساد المالي وتدخل دول الجوار بالشأن العراقي .. ويا حبذا ان يصار الى الاقتصار على المواكب في شعائر عاشوراء

تدري جيران الوطن متآمرين
على تمزيق الوطن متوحدين
يا امام الثائرين على دربك سائرين
يا حسين

وين حامي الحرب على المفسدين
ليش ماشفنه حكم على المجرمين
رقابهم محد لواها
لاقضاء ولا نزاهه
تعال شوف هذا الظلم والجور يا حسين

هاي الوزارة نوجه الهه العتب
واقعنه نفسه باقي شنهو السبب
معقولة هذا الصار ويصير
الهاي الامور انريد تفسير
تعال شوف هذا الظلم والجور يا حسين

وين الاعمار الوطني .. وين الليحجون
واحدهم جاي يفرهد ... خلي يسمعون
كل القصة ومابيها .. حاميها حراميها
يا حسين اسمع هذا الصوت

شعبي كالجمل اكله صبح عاكول
لكن على الظهر كله ذهب محمول
شنهو الذهب مفعوله
لو حاير بعاكوله
يا حسين يا حسين

خلي الروح العدوانية تموت اليوم
وارفع عنوان الوحدة يكفينا هموم
وحدتنا العراقية ... هيه المرجيه هيه
يا حسين اسمع هذا الصوت

ثروة ومنهوبه وتلعب بيهه الاحزاب
وابن بلادي ضايع ما بين الاغراب
والجمعية الوطنية ... رواتب مليونية
يا حسين اسمع هذا الصوت

انتبه شعبي واخذ كل الحذر
منا الجوار اصبحت كلهه خطر
إتحيطك افاعي تكطر سموم
غايتهه توكع بعد ما تكوم
محروس يا هل الوطن ... محروس يا هل الوطن

كالو اجه التغيير ..كلنه انسعدنه
تالي صفت مكلوب .. والله انمردنه
نبقه اعله هل المنوال
انريد اليغير الحال
بالطف دمك سطع يا حسين

الوطن من ينباك صوج النواطير
الشعب ضحه هواي ماعنده تقصير
نحجي ونظل انعيد ... حارس امين انريد
بالطف دمك سطع يا حسين

سجل يا شعب تاريخ الك مشهود
كل هذا الجره وصبرك بلايه حدود
لازم تعبر الشدة ... صيح بصوت واتحده
اسمع يا وطن هاي الحناجر


شمعنه على الجره سكتت حكومتنه
جار النه يمد ايده على ثروتنه
ليش يموت جندينه .... يا ناس بشواطينه
اسمع ياوطن هاي الحناجر

ماضي على العهد شعبك يبو الثوار
كل جيل اليجي يستكمل المشوار
لا ما نقبل الذلة ....والما يعرف انكله
اسمع يا وطن هاي الحناجر

يبو اليمه شعبك ايعيش ابمآسي
والقوائم همهه توزيع الكراسي
رشوة وارهاب وبطالة
والشعب ساءت احواله
والله ملينه الوعود ... كافي ملينه الوعود

شع بكربلا ضيك يبو الاحرار
علمنهج مشينه ومانهاب اخطار
موكبنه بشهر عاشور ... ينهض على الظلم ويثور
اسمع يا وطن هاي الحناجر

نطالب يمجلس والطلب سجله
انريد الحلول المقنعه وعاجله
حكم ضميرك خلي احساس
تخدير كافي ملت الناس
محروس يا هل الوطن ... محروس يا هل الوطن

انريد الرئاسة اتصير شدة ورد
كل الاطياف بهل البلد تتحد
نريد الحكومة القادمة بالعدل
تخدم شعبنه وعنه لا ماتزل
الشعب ضحه وضاك آهات
انريد اليعوض عنه ما فات
محروس يا هل الوطن محروس يا هل الوطن

كافي جرعنه هواي هم وسكم
مابينه بعد ردود نحمل هضم
احنه صبرنه صبر ايوب
يردون منه نصبر انوب
محروس يا هل الوطن محروس يا هل الوطن

عولمة امريكا صفت مشكله
تقيد شعوب العالم بسلسله
ناقوص دك بالخطر انذار
نهج الجديد للاستعمار
محروس يا هل الوطن محروس يا هل الوطن