عطشني بحلاتك ارد اموت عليك

عطشني بحلاتك ارد اموت عليك ،،
واسكَـيني ابمرارك احتي واسكر .
يل تارس شليلك بالورد اشكال ،،
وبخدك ورد كل شوفه يتغـير .
أدوخ أمفـصلات اشفايفـك تـفـصال ،،
من تغـضب شكل وبشكل من تغـتر .
يل المعـتـق عيونك بالخمر بهداي ،،
بس ادير عينك عل الخلكَـ تسكر .
اشوفنك امكَـبع ما افرزن هاي ،،
عباية المتك لو شعـرك اطشر .
مدري اشلون تمشي ،، واتمشي مدري اشلون ،،
كَـوه امركدات الخصر والموكر .
ماتكفيك اديه من ا حضن الجتفين ،،
بس خصرك الزمه باصبعـين اكَـدر .
لو اعرف زفيرك جاب عطره منين ،،
تسمح لليحب بالزفر يتعـطر .
انا بكل قواي وبس تحرك اشفاك ،،
احس اتموع روحي ابسدك واخدر .