الرئيسية
في البدء كانت ا
أحدث الصور
دخول
الموقع : خرزة المسؤولين في تفجيرات الوزارات
>
> هل سمع أي منكم الاخبار, الاربعاء الدامي و الاحد الدامي و الحبل عالجرار , والعجيب ان المسؤولين ( شايلين خرزة ) لو بس يكولولنة من يا سحّار جايبيها جان رحنة عليه ,على الاقل لو كانت خرزة ضد مفخخات الوزارات هم جان نقبل ... يعني خرزة اختصاص.
>
>
>
> انظروا الى الصدف العجيبة , في انفجار وزارة الخارجية و بنفس اليوم ذهب هوشيار زيباري الى اربيل و اخذ معه كل كوادر الوزارة من الاكراد للاحتفال بافتتاح برلمان كردستان ؟؟؟؟؟
>
>
>
> شلون بخت ؟ يعني ان أي كردي لم يقتل في الانفجار , و نفس الحال مع وزارة المالية لان الوزير حافر ملجأ ( بالدريل) طبعا هوه اختصاص دريلات مثل ما تعرفون.... استيراد و تصدير و تزريف, و سبحان الله.. كان يبيض الحياطين من طكت المفخخة ؟؟؟؟؟
>
>
> و الان ... شوف شلون صدفة !!! وزير العدل الكردي دارا نور الدين , ايضا لم يصب باذى بانفجار سواها للوزارة خرابة , بس هم مع الاسف بسرعة تشكّون ... لان الوزير (بالصدفة المحضة) كان ذاهب لزيارة مريض !!! عجيب ... هذولة المسؤولين محصنين بسور سليمان , والله لو واحد يصير مسؤول بهالبلد و يخلص .. لا مفخخة و لا عبوة و لا حتى محكمة ممكن تحكمه , يعني عرفنا الحصانة تعفي المسؤول من المسؤولية ! طبعا هذا في العراق الجديد فقط اخواني و اخواتي ... بس شلون هاي الحصانة تخلّص من
> المفخخات ما ادري !!!!
>
>
> و هم طلعلنه قاسم عطا .... عمي هذا فنان , امه جابته و انكطع نسل عشيرته , راسا كال البعث و حجت القاعدة , يابه افتهمنا والله .. أي بس انته شنو شغلتك محلل اخبار لو بالادلة الجنائية ؟ عمي اذا قاعدة و اذا بعث و اذا رفسه نجاني ... ليش بس ولد الخايبة دا يموتون ؟ دجاوبونة على هالسؤال ... لو تدلونه هاي الخرزة منين دانشتري منها ... يا عيني يا قاسم , أي مو ملّينة من الجذب .
>
>
> عمي انته رئيس الوزراء صير حكم ... قاسم شغلته يحلل اخبار لو يحمينا من المفخخات ؟
>
>
> و لو هسه تكول الله الحافظ .. ادري بيك رجال الايمان يخر من اذانك .. بس شويه اللكم و شويه للشعب.
>
>
> منو يتذكر انفجار الزنجيلي ؟ هم الكراد جان عدهم حصانه دبلوماسية ضد الموت !!! و المحافظ ابو دريد .. العفو قصدي دريد كششششش موله ... طيح حظه للولد من كالّه الحرس دخلوا البراميل للعمارة ... هوه طبعا ما عنده ذنب لان الولد حشاكم طايح حظ من كاعه... عباله اوادم و يحجي الحقيقة ... ما يدري هوه و الخلفوه مبيوعين من جمااااااااان.
>
>
> و في هذا الانفجار الجديد , السيد وزير البلديات ما موجود بالوزارة !!! و لا وزير العدل و لا مدحت المحمود رئيس مجلس القضاء ( على العراق ) و طبعا تذكروه لمدحت .. هوه اللي استلم ( السيادة ) من بريمر ... و لا محافظ بغداد !!!! هاي شنو ؟؟ صدك عجيب امور غريب قضية .
>
>
> وين جانوا؟؟؟ ... طبعا هم راح تشكون .. ولا واحد راح يكول ولد الخايبه دا يتعبون من ورانه ... يعني علامودنا مو من ورانه بالبوكه .... ليش هالعقل الوسخ , خلي شويه ننظف كلوبنا.
>
>
> شنو الحل ؟؟ منو يعرف ؟ ... اني رحت على طبيب ذاك اليوم و اخذني على وزير الصحة المفدّى , الوزير كال احسن علاج من حالة الشك عندي هيه انه استخدم عجاج الطبل و فيّ الكمر؟؟؟؟ شلون علاج جذري .. يعني ما راح يخلي أي مرض بينه ... و عليه فأني اطالب الحكومة و الناطق باسمها علي الدباغ باعتباره ( دباغ ) ان يوفروا لنا جلودا مدبوغة لصنع الطبول و استخراج عجاج الطبل للاغراض العلاجية , كما اني اطالب قاسم المو سوي بتوفير الطبول فورا لانه صاحب اكبر خبرة في التطبيل و التزمير
> ... يعني الرجال على خالي بطّال ما يهدّه للطبل لو يعرف ينكبر وياه .. اختصاص اخواني و اخواتي , وبما ان حكومتنا ( تكنوضراط) فكلمن اختصاصه.
>
>
> و ليكن شعارنا من الاحد الدامي فصاعدا
>
>
> جزنا من الطبل أنريد خرزتنا
عذرا للالفاظ الموجودة ولكني نشرته كما وصلني
تحياتي منقووول
